Luk 20 | BOJ | STEP | Bati bei Yesus a atra tal koba miligiq gilsiq dia tamo uŋgasari naŋgi Qotei aqa anjam bole palontosiq minjroqnej. Onaqa atra tamo kokba ti dal anjam qalie tamo naŋgi ti Juda tamo bole bole naŋgi ti bosib nenemyeb, “Ni iga merge. Ni siŋgila qabe na osimqa kumbra endi yeqnum? Yai na ni qariŋmej deqa ni wau endi yeqnum?”

Luke 20

Juda tamo bole bole naŋgi na Yesus nenemyeb, “Yai na ni qariŋmej deqa ni wau endi yeqnum?”

1 Bati bei Yesus a atra tal koba miligiq gilsiq dia tamo uŋgasari naŋgi Qotei aqa anjam bole palontosiq minjroqnej. Onaqa atra tamo kokba ti dal anjam qalie tamo naŋgi ti Juda tamo bole bole naŋgi ti bosib nenemyeb, “Ni iga merge. Ni siŋgila qabe na osimqa kumbra endi yeqnum? Yai na ni qariŋmej deqa ni wau endi yeqnum?” 3 Onaqa Yesus na kamba minjrej, “E kamba anjam bei niŋgi nenemŋgitqa niŋgi e merbiye. 4 Yai na Jon qariŋyonaqa bosiqa tamo uŋgasari naŋgi yansnjroqnej? Qotei na kio? Tamo bei na kio? Niŋgi na merbiye.” 5 Onaqa naŋgi Yesus aqa anjam di qusibqa naŋgi segi segi qairosib maroqneb, “Iga Yesus minjqom, ‘Qotei na Jon qariŋyej’ degsi minjqom di a iga mergwas, ‘Kiyaqa niŋgi Jon aqa anjam quetosai?’ 6 Ariya iga minjqom, ‘Tamo bei na Jon qariŋyej’ degsi minjqom di tamo uŋgasari naŋgi ŋiriŋosib bosib iga meniŋ na lugwab. Di kiyaqa? Naŋgi mareqnub, ‘Jon a Qotei aqa medabu o qaji tamo bole.’” 7 Naŋgi degsib marsib deqa olo Yesus minjeb, “Yai na kio Jon qariŋyej di iga qaliesai.” 8 Onaqa Yesus na kamba minjrej, “Niŋgi degsi merbonub deqa e dego yai na qariŋbonaq bosim wau endi yeqnum di niŋgi merŋgwasai.”

Wain wau taqato tamo uge naŋgi qa yawo anjam

9 Yesus a anjam degsi minjrsiqa olo tamo uŋgasari naŋgi koroinjrsiqa yawo anjam bei endegsi minjrej, “Tamo bei a tigelosiqa aqa wauq gilej. Gilsiqa wain sil yageleŋosiqa tamo qudei naŋgo baŋq di aqa wau uratetnjrsiqa sawa isaq gilsiq dia sokobaiyej. 10 Sonaqa wain gei melionaqa wau lanja na aqa kaŋgal tamo bei minjej, ‘Ni gilsim wau taqato tamo naŋgi minjre, “Wau lanja a na qariŋbqo bonum. Niŋgi wain gei ebibqa osi aiqai.” ’ Degsi minjsiq qariŋyonaqa wau taqato tamo naŋgoq gilsiq minjrej, ‘Wau lanja a na e qariŋbqo bonum. Niŋgi wain gei ebibqa osi aiqai.’ Degsi minjrnaqa naŋgi na a ojsib qalougetosib wiyonab laŋa puluosi aiej. 11 Ainaqa wau lanja na olo kaŋgal tamo bei qariŋyonaq gilnaqa a dego qalougetosib ugeugeiyosib wiyonabqa a laŋa puluosiq aiej. 12 Onaqa wau lanja na olo kaŋgal tamo bei qariŋyonaq gilnaqa a dego qalougetosib ugeugeiyosib wiyonab aiej. 13 Onaqa wau lanja a are qalej, ‘E kierqai? E endegyqai. E ijo segi aŋgro qujai e na tulaŋ qalaqalaiyeqnum qaji di qariŋyit gilqas naŋgi a qalqasai. Naŋgi aqa anjam quetqab. A ijo segi aŋgro deqa naŋgi a qalqasai.’ 14 Degsi are qalsiqa aqa segi ŋiri qariŋyonaq gilej. Gileqnaqa wau taqato tamo naŋgi a unsibqa naŋgi segi segi qairosib mareb, ‘Tamo a bqo endi wau lanja aqa segi ŋiri. A na aqa abu aqa iŋgi iŋgi kalil oqas. Deqa iga a qalsim moiotosimqa wau endi iga na oqom.’ 15 Degsib marsibqa wau lanja aqa ŋiri ojsib wau qalaq osi gilsib dia qalnab moiej.

“Ariya niŋgi kiersib are qalonub? Wau lanja a bosimqa wau taqato tamo uge naŋgi di kiernjrqas? 16 E niŋgi merŋgwai. A bosim naŋgi ñumsim moiotnjrqas. Osim aqa wau di olo yainjrsim tamo qudei naŋgo baŋq di uratetnjrimqa naŋgi na taqatqab.” Yesus a na naŋgi yawo anjam degsi minjrnaqa naŋgi qusib kamba minjeb, “Wau taqato tamo naŋgo kumbra di tulaŋ uge. Naŋgi kumbra deqaji yaib.”

17 Onaqa Yesus a na tamo uŋgasari naŋgi koqnjrsiqa minjrej, “Qotei aqa anjam bei unu. Naŋgi kiyaqa anjam endi neŋgreŋyeb? Agi anjam endegsib neŋgreŋyeb unu,

‘Tal gereiyo qaji tamo naŋgi na tal aqa ai arqsibqa uge qa marsib taqal waiyeb. Onaqa tal aqa ai di Qotei na olo osiq tumaq di tigeltej unu. Tal aqa ai di tal siŋgilatqajqa deqa tigeltej unu.’
18 Deqa tamo kalil uloŋosib tal aqa ai di aqa quraq aiqab qaji tal aqa ai dena naŋgo tanu giŋgeŋyqas. Ariya tal aqa ai di uloŋosimqa tamo bei aqaq aiqas di aqa jejamu ti tanu ti torei paraparayqas.”

19 Yesus a na atra tamo kokba ti dal anjam qalie tamo naŋgi ti yawo anjam degsi minjrnaqa naŋgi qusib endegsib qalieeb, “Yesus a yawo anjam dena gago jejamu qametgwo.” Naŋgi degsib qalieosibqa minjiŋ oqetnjrnaqa Yesus ojqa mareb. Ariya naŋgi tamo uŋgasari naŋgi tulaŋ ulainjrsib deqa naŋgi Yesus ojqa uratosib jaraieb.

Tamo qudei naŋgi Yesus a anjam bei grotim ojqajqa deqa nenemyeb, “Iga Sisar takis yqom e? Yqasai e?”

20 Deqa naŋgi Yesus laŋa koqyesoqneb. Osib endegsib are qaleb, “Iga tamo qudei qariŋnjrnam naŋgi Yesus aqa areq gilsib anjam bei nenemyibqa a anjam grotimqa di iga qusim ojqom. Ojsim Rom naŋgo gate koba aqa baŋq di atqom.” Naŋgi degsi are qalsibqa tamo qudei minjreb, “Niŋgi na Yesus gisaŋyosib anjam bei nenemyibqa a niŋgi tamo bole edegwas. Osim anjam bei grotqas. Yimqa iga na ojqom.” 21 Naŋgi na tamo qudei degsib minjrsib naŋgi qariŋnjrnab Yesus aqa areq gilsib gisaŋyosib minjeb, “O Qalie Tamo Koba, iga qalie, ni anjam bole maro qaji tamo. Ni anjam bole segi tamo uŋgasari naŋgi minjroqnsim Qotei aqa kumbra osornjreqnum. Ni tamo bei ulaiyosaieqnum. Ni tamo ñam ti naŋgi anjam bei minjroqnsim olo tamo ñam saiqoji naŋgi anjam bei minjrosaieqnum. Ni anjam qujai tamo kalil naŋgi minjreqnum. 22 Deqa ni iga merge. Iga Sisar takis yqom e? Yqasai e? Ni kiersi are qalonum?” 23 Onaqa Yesus a naŋgo areqalo uge di poiyonaqa minjrej, 24 “Niŋgi meniŋ silali bei osorbiye.” Degsi minjrnaqa naŋgi meniŋ silali bei osi bosib osoryonab unsiqa minjrej, “Meniŋ silali quraq endi tamo yai aqa ulatamu ti ñam ti unu?” Onaqa naŋgi na minjeb, “Di Sisar aqa ulatamu.” 25 Onaqa a na minjrej, “Deqa Sisar aqa iŋgi iŋgi a qa olo yiye. Ariya Qotei aqa iŋgi iŋgi a qa olo yiye.” 26 Onaqa naŋgi Yesus aqa anjam di qusib naŋgi tulaŋ prugeleŋosib anjam bei minjqa keresaiinjrnaqa mequmosib soqneb.

Tamo moreŋo qaji naŋgi olo subq na tigelqajqa anjam deqa Sadyusi naŋgi na Yesus nenemyeb

27 Onaqa Sadyusi tamo qudei naŋgi Yesus a nenemyqa beb. Sadyusi naŋgi mareqnub, “Tamo moreŋo qaji naŋgi olo subq na tigelqasai.” 28 Deqa naŋgi bosib Yesus endegsib nenemyeb, “O Qalie Tamo Koba, ni que. Moses a nami anjam endegsi neŋgreŋyej, ‘Tamo bei a moiimqa aqa ŋauqali aŋgro saiqoji soqnimqa aqa was bei na olo uŋa qobul di osimqa aqa was moiej qaji aqa aŋgro ŋambabtetqas.’ Moses a nami anjam degsi neŋgreŋyej. 29 Deqa ni que. Was 7-pela naŋgi soqneb. Naŋgo was matu a uŋa osiqa moiej. A aŋgro saiqoji. 30 Onaqa aqa aube yala na olo uŋa qujai di osiqa a dego moiej. A aŋgro saiqoji. 31 Onaqa aqa aube yala na olo uŋa qobul di osiqa a dego moiej. A aŋgro saiqoji. Degsib gilsib was 7-pela kalil naŋgi uŋa qujai di osib moreŋeb. Naŋgi aŋgro saiqoji. 32 Naŋgi kalil moreŋonabqa ariya bunuqna uŋa di a dego moiej. 33 Ni iga merge. Mondoŋ subq na tigelo batiamqa tamo kalil naŋgi subq na tigelabqa uŋa di a yai aqa ŋauŋ tiŋtiŋ sqas? Ni qalie, naŋgi kalil uŋa qujai di eb.”

34 Onaqa Yesus na minjrej, “Mandamq endia tamo naŋgi uŋateqnub. Uŋa naŋgi tamoteqnub. 35 Ariya mondoŋ Qotei aqa segi tamo uŋgasari nami giltnjrej qaji naŋgi subq na tigelosibqa naŋgi tamotqasai. Naŋgi uŋatqasai. 36 Naŋgi laŋ aŋgro bul laŋa sqab. Deqa Qotei na naŋgi subq na tigeltnjrimqa naŋgi aqa segi aŋgro bole sqab. Deqa naŋgi olo moreŋqa keresai. 37 Ariya tamo naŋgi olo subq na tigelqab deqa e niŋgi endegsi merŋgwai. Moses a nami Qotei aqa anjam bei endegsi neŋgreŋyej unu, ‘Ŋam mariŋ miligiq dia puloŋeqnaqa Qotei a ŋam puloŋq di sosiqa Moses metosiq minjej, “E Abraham aqa Qotei. E Aisak aqa Qotei. E Jekop aqa Qotei.” ’ 38 Moses a anjam degsi neŋgreŋyej. Anjam dena iga poigwo, Qotei a tamo moreŋo qaji naŋgo Qotei sai. A tamo ŋambile so qaji naŋgo Qotei. Di kiyaqa? Naŋgi kalil aqa ŋamgalaq di ŋambile unub deqa.”

39 Onaqa dal anjam qalie tamo naŋgi Yesus aqa anjam di qusibqa naŋgi olo anjam bei nenemyqajqa keresaiinjrej. Deqa naŋgi na minjeb, “O Qalie Tamo Koba, ino anjam di bole.”

Yesus a tamo uŋgasari naŋgi Kristus qa anjam bei nenemnjrej

41 Onaqa Yesus na olo minjrej, “Tamo uŋgasari naŋgi mareqnub, ‘Kristus a Devit aqa ŋiri.’ 42 Ariya Devit a segi nami marej, ‘Kristus a ijo Tamo Koba dego.’ Agi louqa buk miligiq dia Devit a anjam endegsi neŋgreŋyej,

‘Tamo Koba Qotei na ijo Tamo Koba minjej,
“Ni ijo baŋ woq endi awo.
Awesoqnimqa e na ino jeu tamo kalil naŋgi eleŋosiy ino sorgomq di atitqa ni na naŋgi taqatnjroqnqam.” ’
44 Niŋgi uniye. Devit a segi marej, ‘Kristus a ijo Tamo Koba.’ Deqa Kristus a kiersi Devit aqa ŋiri sqas?”

Dal anjam qalie tamo naŋgi kumbra uge uge yeqnub

45 Tamo uŋgasari kalil naŋgi Yesus aqa anjam di queqnabqa naŋgo ŋamgalaq dia aqa aŋgro naŋgi anjam endegsi minjrej, 46 “Dal anjam qalie tamo naŋgi kumbra uge uge yoqnsib laqnub. Deqa niŋgi na naŋgo kumbra uge di geregere tenemtoqniye. Tenemtsib naŋgo kumbra di dauryaib. Naŋgo kumbra uge agi ubtsiy merŋgwai. Naŋgi bati gaigai koro sawaq dia gara jugo olekokba jugoqnsib laqnibqa tamo uŋgasari naŋgi na naŋgi unjrsib naŋgo ñam soqtetnjrsib baŋ ojetnjroqnqajqa deqa naŋgi gara walaosi laqnub. Naŋgi bati gaigai Qotei tal miligiq dia tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib biŋinjrqajqa deqa naŋgi areboleboleinjreqnu. Naŋgi goio kokba bati qa giloqnsibqa tamo ñam ti naŋgo awo jaramq dia awooqnibqa tamo uŋgasari naŋgi na naŋgi unjrsib naŋgo ñam soqtetnjrqajqa deqa naŋgi areboleboleinjreqnu. 47 Naŋgi na uŋa qobul naŋgi gisaŋnjroqnsibqa naŋgo tal ti iŋgi iŋgi ti laŋa yainjreqnub. Naŋgi qure ambleq dia tigeloqnsibqa tamo uŋgasari naŋgi na naŋgi unjrsib naŋgo ñam soqtetnjroqnqajqa deqa pail olekokba yeqnub. Di gisaŋ koba. Deqa mondoŋ tamo naŋgo une qa peginjrqa bati qa Qotei na naŋgi gulube tulaŋ kobaquja enjrqas.”